KANA NDADA ZVEKUNYORA

Handidi!
handidi  kutsiurwa,
handidi  kusvoteswa,
handidi kunyombwa,
handidi kumbunyikidzwa,
handidi kutosvorwa,
handidi kutsvinyirwa
handidi,
kana ndada zvekunyora.

Ndinosuduruka.
Ndinonyahwaira.
Ndinodzanadzana.
Ndinohwanda mumhango.
Ndarodza dzangu pfungwa,
handidi kukanganiswa
handidi,
kana ndada zvekunyora.

Shiri, uswa nemiti,
makomo, ivhu nemhuka
ndizvo bedzi zvinondishamwaridza
kamhepo kachifefetera,
ndichinzwa kushona kwerwizi.
Ndamona hata yenjere mumusoro,
handidi kutsamwiswa
handidi,
kana ndada zvekunyora.

Ndinodzamisa ndangariro.
Ndinokwira chitundumuseresere,
kusvika Joni, Amerika kana nyikadzimu.
Ndinodzoka kuva pwere kana rusvava.
Ndinosanduka kuva benzi kana harahwa.
Ndinomera zenze kana mapapiro,
kuva shumba kana shiri.
Ndinomera ndebvu kana mazamu,
kuita murume kana mukadzi.
Ndinokwira pamusorosoro pegomo kana pachisuvi
asi handidi kutokonywa-tokonywa
handidi,
kana ndada zvekunyora.

Ndinoramwa zvekudya.
Ndinotadza kushamwaridzana nemvura.
Handidi shamwari kana hama pedyo.
Handidi kugumburwa kana kugumwa.
Ndinosvimha misodzi,
dzoyerera mumusoro pfungwa
handidi,
kana ndada zvekunyora.

Handidi, handidi, handidi!
handidi  kutsiurwa,
handidi  kusvoteswa,
handidi kunyombwa,
handidi kumbunyikidzwa,
handidi kutosvorwa,
handidi kutsvinyirwa
handidi,
kana ndada zvekunyora.

© Conarth Macheka – 28 Kubvumbi 2013

MHAMBA (YEMADEKO)

Musoro kurema sendakatsiga danda,
Hana chipitipiti kubika manhanga,
Meso piriviri seegudo radya chiwirowiro,
Aiwa kwese uku kungori kutamba
sezvo dzingori mviromviro.

Kungowuti musuva kobo mukanwa
Unongobuda sezvawanga uri
Muviri wese kuita seusi wemwene
kuita kunge wakaradzikwa pabanda
Zvese izvi zvichipa dudziro

yekwawanga uri nezuro

nekuda kwemhamba yemadeko.

Aiwa, kana musingagone kudira mvura

Kana musingagone kuti ndabvuma, ndagura,

bva chiregai henyu muchagona mukanya
Ramashapira rakwana,
Zvikagoipei kungosiirawo vamwe?                           

© Conarth Macheka - 25/8/2012

TASVIKA PAKUPWA KWERUDO

Unoita sewava nezana remakore waenda, warova,
Yeuchidzo ingonono dzaunorova,
Nehwema hwunobuda mune dzako hapwa,
Pamwe nechisipiti chemasiriri anoyerera, chisingapwi.
Chiripi chitubu cherudo nhaka chawakati hachipwi?

Bengenuka dhiya, tisasvika pakupwa kwerwedu rudo.

Kurara ndinorara meso dziri nyimo,
Chikonzero nei kuita seunondinyemudza, seunonyima?
Uchiita seusipo iwe uripo?
Nhaka zvandakafirwa nerudo iye murume aripo?

Ichokwadi here

kuti tasvika pakupwa kwerudo?

Zvandave shirikadzi,
asi vanoona vachiti tiri murume nemukadzi.
Ndine mhezi yavavira mukatikati memwoyo,
ndikwenyewo kani nhai mudikani,
Bva, chindibata ndigoziva kuti uripo,
Nyangwe akayambuka nyanza akagodzoka wani?    

Huya, chiuya kani,

tisasvika pakupwa kwerwedu rudo.              

© Conarth Macheka - 1/9/2012

WIRI (WILL)

Zvino chadenga chese zvachakombwa neguti
Ndinoshuva kusiya ndarayira nekuti,
Handidi kuti zvese zvangu zveziya
Zvese-zvese zvandichasiya,
Zvandakasevenzera semuranda,
Handidi kuti kana ndaenda,
Handidi kuti zvidyiwe nemagora,
Vajaira kudya zvavasakashandira.                                         

© Conarth Macheka - 27/8/2012

NHASI NDADIWA

Nhasi ndadiwa -
ndadiwa nenyenyedzi yehweva,
yanditeya nemiranzi yayo,
ndokundikweva ichikwira neni,
kudenga-denga, kupfuura makore, kumwedzi -
kusina ani nani anosvika.

Nhasi ndadiwa -
ndadiwa nenjuzu,
yandimonera,

ikandifukidza newayo muviri munyoro-nyoro,
ndokundikwevera pasi-pasi pedziva -
pasina ani nani anosvika.

Nhasi ndadiwa -
ndadiwa nechamupupuri,
chandizvuzvurudza chikaenda neni,
ndokundipotsera mujinga mechikomo chezviyerayera -Chimedzanemburungwe -
kusina ani nani anosvika.

Nhasi ndadiwa -
ndadiwa nemazikope egute,
andikakatira pakatikati paChivero,
muzere mvura izere nezerere,
nemuchetura unouraya,
makwaya, twumbuyu nezvese zvinofema -
kusina kana ani nani anosvika.                                                           

© Conarth Macheka - 3/9/2012