Kutamba,
kutamba nhando –
kutamba-tamba
sechidembo chakadzipwa nekumuswe
nyemwerero
yakashongedzwa pamusoro pehusvinu
zviuya
zvichiitirwa kufadza vari panze, zvese-zvese zvisvinu
kutamba,
kutamba-tamba, kutambirira vari panze mukati semune zviuya
uchati chii kana wobvunzwa nevana:
“ko nhai, makakwana here imi mhai?”
uchati chii kana wobvunzwa nevana:
“ko nhai, makakwana here imi mhai?”
Kupembera
nhando -
kupembera-pembera,
kufarira rugare rwemumwe iwe uri muhondo
mwene
sewabata bhiza, kupururudza segurwe
nyangwe
wakagarira tsono, bishi kuparura chikuwe
kupembera, kupemberera chimwango chemumwe iwe uchidya nhoko dzezvironda
uchazoti chii kana vana vobvunza:
“imi baba, paipfuma vamwe maibatei nhai?”
kupembera, kupemberera chimwango chemumwe iwe uchidya nhoko dzezvironda
uchazoti chii kana vana vobvunza:
“imi baba, paipfuma vamwe maibatei nhai?”
©
Conarth Macheka 7 Kubvumbi 2013
No comments:
Post a Comment